અભિપ્રાય

• પ્રજ્ઞા વશી

કેટલાક યુવા સર્જકોની કલમની લખાયેલ કૃતિ માંથી હું પસાર થઈ ત્યારે મને ખૂબ આનંદ થયો અને સાથે સાથે ધરપત થઈ કે ગુજરાતી ભાષા હંમેશા જીવંત જ રહેવાની છે.

- યુવા કવિ તરૂણ મહેતાના કાવ્ય ' ગામને પાદર'માંથી પસાર થતાં ખૂબ જ આનંદ થયો. આ અછાંદસ  કાવ્યમાં તરૂણ મહેતા પોતાના વતનના ગામને પાદરે વર્ષો પછી જાય છે અને ત્યાં જઈને જુએ છે કે બહુમાળી ઇમારતોએ એમના સુખનું સરનામું જ મીટાવી દીધુ છે. શહેરીકરણ કવિના સુખને ભૂંસી નાખે છે અને સાથે સાથે સંબંધોની મજબૂત કડી પણ તોડી નાખે છે. લેપટોપ ખોલી કવિ પોતાના ગામની જૂની તસવીર જુએ છે અને ત્યારે જાણે ગામના પાદરમાં પ્રાણ પુરાતા હોય તેવું લાગે છે. ક્યાંક ટહુકા તો ક્યાંક પતંગિયાની ઉડાન .... એટલું જ નહીં, સુકાયેલી નદી પણ જીવંત થતી હોય એવું કવિ અનુભવે છે. આ નદી મનમાં જીવંત થતાં કવિની આંખોમાં પણ તૃપ્તિની નદી છલકાય છે. તાજગીસભર રચના માટે કવિને અભિનંદન

-   કવિ પાયલ ધોળકિયાએ પરિષદ માટે, પરિષદની આ પ્રવૃત્તિ માટે સરસ હાઇકુ લખ્યું છે. એમણે વૈશ્વિક મારામારી વચ્ચે પરિષદ આ પ્રવૃત્તિ કરી રહી છે તેને ઉચિત રીતે જ આવકાર આપ્યો છે. તેમની અછાંદસ રચનાઓમાં સંબંધોની ઘટથી ઉષ્માની ચિંતા વ્યક્ત થયા કરે છે. તેઓ સંબંધોને વેન્ટિલેટર પર  પાંગરતા જુએ છે. તેમને લાગણી ના બેસણા ચોતરફ ફેલાતા લાગે છે. એમની કલમ વધુ સશક્ત બને તેવી શુભેચ્છા..

- કવિ અર્પણ ક્રિસ્ટીની ગઝલ વાંચીને એમ લાગે કે કવિને ગઝલ વધુ અનુકૂળ છે જાતથી પણ દૂર હું ઠેલાઉં છું' ગઝલ ખુબ સુંદર છે. છંદ ની સફાઈ ઊડીને આંખે વળગે છે. તેઓ ગીત અને ગઝલમાં વધુ સાધના કરે તેવી અપેક્ષા..

- કવિ સપન પાઠકનું સોનેટ ' અંકુરણ ' વાંચનારને પણ ભીનાશ આવી જાય તેવું છે.  આજે જ્યારે સોનેટ વધુ લખાતા નથી ત્યારે આ  કવિ શાર્દૂલવિક્રીડિત છંદમાં પૂરી સભાનતાથી સોનેટ સર્જે છે તેનો આનંદ થાય છે. સોનેટમાં અપેક્ષિત એવી અંતિમ પંક્તિ ની ચોટ પણ અહીં અભિવ્યક્તિ પામી છે.

- કવિ મનુ. વી. ઠાકોર 'મનન' નું ગીત ' કેમ કરી કાઢવી આ રાત્યું?' માં વિરહની વાત તળપદા શબ્દોમાં સુંદર રીતે ગૂંથાતી આવે છે. આ યુવાન સહેજ વધારે સાવધ રહી ગીતમાં કામ કરે તો સુંદર પરિણામ ભવિષ્યમાં મળે તેવી આશા તેમના આ ગીત પરથી બંધાય છે.

-  કવિ નિલેશ સાટિયા ' મન 'ના ગીત 'કોણ કરે છે વાતું? માં સંવેદન અને અભિવ્યક્તિનું સુંદર આયોજન થયું છે. કવિને શુભેચ્છાઓ ...

-  યોગીની ચાવડાની ' એક  દબાયેલું ડૂસકું ' શીર્ષક ધરાવતી અછાંદસ રચનામાં નારીની વેદના, જે યુગોથી અવ્યક્ત રહેલી છે તેને પુરી સંયત છતાં કલાત્મક રીતે  વ્યક્ત કરવામાં આવી છે. તેઓ ભવિષ્યમાં ઉત્તમ રચનાઓ આ માર્ગે જ આપશે તેવી આશા આ અછાંદસ કાવ્ય આપે  છે.

- કુલદીપ કારિયાની ગઝલના શેર મનમાં વસી જાય તેવા છે. 'ખિસ્સા માં પડ્યું છે હમણાં સુધી, થયું બે મિનિટમાં મરણ આમતેમ' શેર તો યાદગાર બની રહેશે.

- નરેશ સોલંકી પણ એક સાદ્યંત સફળ ગઝલ આપે છે. કુલદીપ અને નરેશ બંને ગુજરાતી ગઝલને ઘણું ઘણું આપશે તેવી શ્રદ્ધા તેમની રચનાઓ પરથી જાગે છે.

- હાર્દિ ભટ્ટ  ' યાજ્ઞસેની' રચનામાં દ્રૌપદીના ચીર હરણના પ્રસંગને સાંપ્રત સાથે લયબદ્ધ રીતે જોડે છે. પ્રવાહી લયમાં પાઠ થઈ શકે અને કવિતા વાંચવાનો સંતોષ પણ મળે તેવી તેમની રચના છે.

- અક્ષય દવે ની રચના 'ઊંઘ' એક જુદા પ્રકારની રચના છે. એમાં ઊંઘને પ્રત્યક્ષ કરાવવાનો કવિનો પ્રયત્ન છે. થોડી તાર્કિકતા અને રચનારીતિનું સંયોજન થયું હોત તો રચના વધુ સ્પર્શી જાત. જો કે અહીં અમૂર્ત એવી ઊંઘને મૂર્ત રૂપ આપવાનો કવિ નો પ્રયાસ રસપ્રદ તો છે જ ...

- અલ્પા વિરાશની વાર્તા ' તૂરી '  પાત્રાલેખન અને અંત ની દ્રષ્ટિ એ મને ગમી ગઈ. વાર્તાનો અંત અને વાર્તા મુકવાની સર્જકની રીત પણ વાર્તાને સફળ બનાવે છે.

- સંજય પટેલની 'દીકરીનું ઘર' વાર્તા પણ રચનારીતિ અને સંવેદનની રીતે આસ્વાદ્ય છે. ઘટના સંયોજનની કળા લેખકને હસ્તગત છે તેવું વાર્તામાંથી અનુભવાય છે. વાર્તાનો ક્રમશઃ થતો વિકાસ, નાથીબા નુ પાત્રાલેખન અને વાર્તાનો અંત સુંદર છે. શૈલી પણ વિષયને અનુરૂપ છે. વાર્તાકારને અભિનંદન.

- ' સ્વપ્ન સમી નદી' - ધારા હરસોરાના નિબંધમાંથી પસાર થતાં ગદ્યની પ્રવાહિતા અનુભવાય છે. સંગમ સ્થાને આવી નદી સાગરમાં સમાઈ જવાની એ નદી જાણે છે છતાં, નદી નો ધર્મ છે આગળ ને આગળ વહેવાનો.. પણ સંગમ સ્થાને એ નવોઢાનું રૂપ ધારણ કરે ત્યારે એના સપના નું શું? નદી અને સપના જોડાજોડ મૂકીને એક સરસ કૃતિ લેખિકા સર્જી શક્યા છે.

- અંતે સર્વે સર્જકોને અભિનંદન.

છેલ્લે, આપણી પરિષદ સુંદર પ્રવૃત્તિ કરે અને હું એમાં જોડાઈ એનાથી રૂડું બીજું શું?

આભાર.

-પ્રજ્ઞા વશી, સુરત

⇔