યુવા-સ્વર-૧૧

૧. સાહિત્ય એટલે "સ+હિત". સર્જન કરવું એજ કવિજીવનનું લક્ષ્ય છે. સાહિત્ય ન હોત તો દુનિયા અધૂરી અને અંધારી લાગત. માટે સાહિત્ય સર્જન એજ કવિધર્મ

૨. કવિતા એટલે હ્ર્દયની ઊર્મિઓનો શબ્દદેહ.
જીવનનાં અનુભવોનો નિચોડ, પ્રણય, વિરહ અને વ્યથાનું તદ્ર્શ ચિત્રણ એટલે વાર્તા.
જિંદગીમાં જીવાતાં, ગમતાં, અણગમતાં પ્રસંગોનું વણાટકામ એ નાટક.

૩. આપણો આ યુગ દિશાહીન યુગ છે. છતાં પોઝિટિવ વિચારો ને લઈને કરાતું સર્જન એ આજનાં યુગની મૂળભૂત જરૂરિયાત છે. જે તમને નેગેટિવ થીંકિંગથી દુર લઇ હકીકતથી રૂબરૂ કરાવે એ જરૂરી છે.

૪. મારો ગમતો સર્જક પન્નાલાલ પટેલ છે. તેમની "મળેલાં જીવ", "માનવી ની ભવાઈ" જેવી કૃતિઓમાં માનવીય વિડંબણા, વ્યથા, ભૂખમરો વેઠ્યા છતાં અડગ રહેતાં માનવની કથા આલેખાઈ છે. તેમની ગ્રામીણ સરળ ભાષા મને સ્પર્શી જાય છે.

૫. મારો ગમતો ભારતીય સર્જક રવીન્દ્રનાથ ટાગોર છે. વિશ્વ સાહિત્યની ગમતી રચના Earnest Hemingway ની The Old Man And The Sea છે.

૬. વાંચનનો શોખ મારા દાદા પાસેથી વારસામાં મળેલો છે. એટલે ગોવર્ધનરામ ત્રિપાઠી, ચુનીલાલ મડિયા, દેસાઈ, પીતાંબર પટેલ વગેરે સર્જકોનાં સર્જન થી હું પ્રભાવિત છું. અને ઘાસલેટ સાહિત્યથી પર એવાં મૂર્ધન્ય સર્જક રત્નોની ભાષાની અમરતા અને વર્તમાન સમયમાં પણ ઉપયોગી થાય તેવા માનવીય સંબંધોની છણાવટ અને અંતરમાં રહેલી ઉર્મિઓ અને લાગણીની પૂર્ણતા કે અપૂર્ણતાનો કવિન્યાય મને ખૂબ ગમે છે.

૭. કવિતા લખતી વખતે હું પ્રિયકાન્ત મણિયારને આદર્શ તરીકે સામે રાખું છું. તેમની આધ્યાત્મિકતા હૃદયસ્પર્શી છે.

૮. કવિતા, વાર્તા, નિબંધ એ અંગત વસ્તુ છે. આથી સૌપ્રથમ હું મારી કવિતા મારા દાદાને વંચાવું છું અને એમનાં સૂચનો પણ સ્વીકારું છું.

૯. સાહિત્ય સર્જનનાં વાંચન પછી ગુણવંત શાહ, મધુ રાય, ડૉ. જયંત ખત્રી, વીનેશ અંતાણી જેવાં સર્જકોની અથાગ મહેનત અને માનવ જીવનની આંટીઘૂંટી સફળતાપૂર્વક રજૂ કરવાનો કસબ મને ખૂબ ગમ્યો છે.

૧૦. હું અનુસ્નાતકની પરીક્ષાની તૈયારી કરી રહી છું. સાથો સાથ શાસ્ત્રીય સંગીતમાં વિશારદ હોવાથી સંગીત અને સાહિત્યને પૂરતો ન્યાય મળી રહે એ રીતે મારો સમય કાઢી લઉં છું.